2 dhjetor, mëngjes – Një nuse e bukur
Besimtarët kanë një drejtësi të sigurt, e cila u është falur kur “na zgjodhi në të” (Efesianëve 1:4). Kisha nuk është thjesht e bukur—ajo është e bukur sa s’bëhet. Zoti e quan atë: “O më e bukura e grave” (Kënga e Këngëve 1:8). Ajo ka një vlerë dhe shkëlqim të vërtetë, me të cilët nuk krahasohen dot as të gjithë fisnikët dhe mbretërit e mbarë botës.
1 dhjetor, mbrëmje – Ankohu më pak, falëndero më shumë
Madje që tani, përmes besimit, ne mbështillemi me të linjtat e hijshme, të cilat do të jenë zbukurimi ynë i përjetshëm, dhe praktikojmë falënderimin tonë të pambarim për Zotin, Shpengimtarin tonë. Fëmijë i Perëndisë, a mund të rrish vallë pa e hapur gojën? Zgjohuni teksa mendoni për trashëgiminë tuaj dhe çojeni në robëri skllavërinë tuaj, duke kënduar bashkë me Davidin: “Beko, shpirti im, ZOTIN dhe gjithçka që është në mua të bekojë emrin e tij të shenjtë” (Psalmi 103:1). Filloftë ky muaj i ri me këngë të reja!
1 dhjetor, mëngjes – Dimër në shpirt
Shpirti im, filloje këtë muaj dimëror me Perëndinë! Të gjitha borërat e ftohta dhe erërat e acarta të kujtojnë se Ai e mban besëlidhjen e Tij me ditën dhe natën, dhe shërbejnë edhe për të të siguruar se do t’i qëndrojë besnik asaj besëlidhjeje të lavdishme që ka lidhur me ty në personin e Jezu Krishtit. Ai, i cili i qëndron besnik Fjalës së Tij tek ndërrojnë stinët e kësaj bote mjerane të ndotur nga mëkati, nuk do të dalë i pabesë në marrëdhëniet me Birin e Vet shumë të dashur.
30 nëntor, mbrëmje – Gati për betejë
Lavdi i qoftë Perëndisë, ne e dimë përfundimin e betejës! Dragoi i madh do të hidhet poshtë dhe do të shkatërrohet një herë e përgjithmonë, ndërsa Jezusi dhe ata që janë me Të, do të marrin kurorën. Prandaj, le t’i mprehim shpatat sonte dhe le t’i lutemi Frymës së Shenjtë që të na bëjë gati për konfliktin që na pret. Kurrë nuk ka pasur dhe nuk do të ketë betejë tjetër kaq të rëndësishme dhe kurorë tjetër kaq të lavdishme. Përpara ushtarë të kryqit, secili në pozicionin e vet, dhe dashtë Zoti që ta shtrijë të Paudhin poshtë këmbëve tuaja sa më shpejt që të jetë e mundur!
30 nëntor, mëngjes – Shumë më tepër se kaq
Edhe sikur gjërat të bëhen keq e më keq, edhe sikur të humbasim edhe talentin e fundit, nuk e kemi humbur thesarin tonë, sepse ai gjendet atje lart, ku Krishti ulet në të djathtë të Perëndisë. Ndërkaq, madje edhe tani, Zoti bën që zemërbutët ta trashëgojnë tokën, dhe nuk u refuzon asnjë të mirë atyre që ecin drejt.
29 nëntor, mbrëmje – Një vajosje e shenjtë
Çdo gjë e mirë gjendet në Ngushëlluesin hyjnor. Ngushëllimi i pashoq, mësimi i pagabueshëm, ripërtëritja e pavdekshme, energjia frymërore dhe shenjtërimi hyjnor, të gjitha janë të përziera me veti të tjera të shkëlqyera në vajin qiellor të vajosjes së Frymës së Shenjtë. Vaji përhap një aromë erëmirë mbi karakterin dhe natyrën e personit mbi të cilin derdhet. Nuk mund të gjendet asgjë e ngjashme me të në thesaret e zengjinëve ose në sekretet e të urtëve. Nuk është një gjë që mund të imitohet. Vjen vetëm nga Perëndia dhe, përmes Jezu Krishtit, i jepet bujarisht çdo shpirti që e pret. Le ta kërkojmë atë, sepse edhe ne mund ta kemi, madje mund ta kemi që sonte. O Zot, vajosi shërbëtorët e tu!
29 nëntor, mëngjes – Kur vjen qortimi
Me qindra janë shpëtuar nga mëkate të shëmtuara falë paralajmërimeve me dashuri, të urta dhe të bëra në kohën e duhur nga familjarë dhe miq besnikë. Përmes mënyrës se si e qortoi Pjetrin, Zoti ynë Jezus na ka dhënë një shembull të hirshëm se si duhet t’i trajtojmë miqtë që gabojnë: me anë të lutjes që e pararendi dhe me zemërbutësinë që shfaqi tek duroi mohimin mburravec të Pjetrit, i cili e kishte të nevojshëm një paralajmërim të tillë.
28 nëntor, mbrëmje – Të kërkosh më të mirën për kishën
Këtu është momenti për të të pyetur ty, miku im, nëse je duke kërkuar me gjithë fuqinë tënde më të mirën e kishës në lagjen tënde. Shpresoj se nuk je duke i prishur punë kishës me anë të ndonjë hidhësie apo skandali, dhe as duke e dobësuar atë përmes lënies pas dore. Mik, bashkohu me të vobektët e Zotit, mbaje kryqin e tyre, bëju atyre gjithë të mirat që mundesh, dhe nuk do ta humbasësh shpërblimin tënd.
28 nëntor, mëngjes – Ec në të vërtetën
E vërteta ishte në Gajin dhe Gaji ecte në të vërtetën. Fakti i parë është i lidhur me të dytin, sepse po të mos ishte njëri, nuk do të ishte as tjetri; në qoftë se fakti i dytë nuk do të kishte qenë i vërtetë, i pari do të kishte mbetur thjesht një iluzion. E vërteta nuk ka aspak vlerë po nuk hyri në zemër, po nuk depërtoi thellë brenda saj dhe po nuk e mbushi atë deri në grykë.
27 nëntor, mbrëmje – Ëmbëlsia e fjaljes
Dhe kur mendoj se sa të mëdha ishin mëkatet e mia, sa të çmuara ishin pikat e vyera që më pastruan prej tyre, dhe sa e hirshme ishte metoda përmes së cilës u vulos falja për mua, më përshkon një ndjenjë habie adhuruese. Bie përmbys përpara fronit që më shfajëson, kap fort kryqin që më çliron, dhe të gjitha ditët e jetës sime i jap në shërbim të Perëndisë së Mishëruar, falë të cilit sonte jam një shpirt i falur.