Kur kisha begati thosha: “Unë nuk do të lëvizem kurrë.”
Psalm 30:6
Jepini dikujt pasuri; le të sjellin gjemitë e tij mallra të shtrenjta pa ndërprerje; le të shfaqen erërat dhe dallgët si shërbëtorët e tij, për t’i mbartur anijet e tij mbi thellësitë e mëdha të detit; le të japin prodhim të bollshëm tokat e tij; le të jetë moti i mbarë për të korrat e tij; le ta ndjekë suksesi hap pas hapi; le të bëjë emër mes njerëzve si një tregtar i suksesshëm; le të mos i mungojë kurrë shëndeti; lejojeni të marshojë nëpër botë me nerva të çelikta dhe sy xixëllues, dhe të jetojë lumturisht; jepini atij shpirtin e haresë; le të jetë përherë me këngë në gojë; le të shkëlqejnë gjithmonë sytë e tij nga gëzimi—dhe keni për ta parë që pasoja e pashmangshme e një jete të tillë tek çdo njeri, qoftë ky edhe i krishteri më i mirë që ka jetuar ndonjëherë, do të jetë mendjemadhësia. Edhe Davidi tha: “Unë nuk do të lëvizem kurrë”, dhe ne nuk jemi më të mirë se Davidi, madje nuk jemi as sa gjysma e tij.
Vëlla, ruaju nga vendet e sheshta të rrugës; edhe nëse po ecën nëpër to, edhe nëse po ecën në rrugë të vështirë, falënderoje Perëndinë për këtë! Nëse Perëndia do të na përkundte përherë në djepin e begatisë, nëse do të tundeshim tërë kohën mbi gjunjët e fatit, nëse qielli do të ishte gjithmonë pa re dhe nëse nuk do të kishte pika të hidhura në verën e kësaj jete, me siguri që do të deheshim nga kënaqësia dhe do të zinim të ëndërronim se po qëndronim—dhe do të qëndronim, mirëpo, kjo do të ishte mbi një kulmare; ashtu si ai njeriu që fle mbi direkun e anijes, ne do të ishim përherë në rrezik.
Ne e bekojmë Perëndinë, pra, për vuajtjet tona; e falënderojmë Atë për ndryshimet tona; e lartësojmë emrin e Tij për humbjet e pasurisë sonë; sepse e dimë që nëse nuk do të na kishte ndëshkuar kësisoj, mund të kishim mbetur pengje të sigurisë sonë të gënjeshtërt. Begatia e vazhdueshme e kësaj bote është një sprovë zjarri.
Vuajtjet, edhe pse duken të rrepta,Shpesh janë të dërguara prej mëshire.
Devocione “Mëngjes dhe mbrëmje” nga C. H. Spurgeon, rishikuar dhe përditësuar nga Alistair Begg.
Përktheu: Elton Tahirllari | Redaktoi: Rudina Boçe
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
© dritez.al 2023