“Ai do t’ju japë një Ngushëllues tjetër, që do të qëndrojë përgjithmonë me ju.”
Gjoni 14:16
Perëndia Atë iu zbulua besimtarëve në Dhiatën e Vjetër përpara ardhjes së Birit të Tij, dhe nga Abrahami, Isaku dhe Jakobi njihej si Perëndia i Plotfuqishëm. Më pas erdhi Jezusi, dhe Biri i shumëbekuar, vetë si person, ishte ëndja e syve të popullit të Tij. Pas ngjitjes në qiell të Shpenguesit, Fryma e Shenjtë u bë kreu i epokës së tanishme dhe fuqia e Tij e lavdishme u dëshmua gjatë dhe pas Rrëshajave. Ai vazhdon edhe sot e kësaj dite të jetë Emanueli i tanishëm—Perëndia me ne, duke banuar në dhe me njerëzit e Tij, duke i rigjallëruar dhe drejtuar ata, si edhe duke sunduar në jetën tona.
A njihet prania e Tij ashtu siç duhet? Ne nuk mund t’ia kontrollojmë dot veprën; Ai është sovran në gjithë veprimet e Tij. Mirëpo, a jemi aq sa duhet të etshëm për ta fituar ndihmën e Tij, ose aq sa duhet syçelë, për të mos e trishtuar Atë, saqë Ai ta tërheqë ndihmën e Tij? Pa Të nuk mund të bëjmë asgjë, por në sajë të energjisë së Tij të plotfuqishme mund të arrijmë rezultatet më të jashtëzakonshme: gjithçka varet nga shfaqja ose fshehja e fuqisë së Tij.
A i mbajmë gjithmonë sytë tek Ai, qoftë për jetën tonë të brendshme, ashtu dhe për shërbimin tonë të jashtëm, me varësinë plot respekt që i shkon për shtat personit të Tij? A nuk ndodh shumë shpesh që të ngutemi përpara se Ai të na ketë thirrur dhe të veprojmë në mënyrë të pavarur nga ndihma e Tij?
Le ta përulim veten sonte për pakujdesitë e kaluara dhe le t’i përgjërohemi vesës hyjnore të qëndrojë mbi ne, vajit të shenjtë të na vajosë dhe flakës qiellore të digjet brenda nesh. Fryma e Shenjtë nuk është një dhuratë e përkohshme—Ai qëndron me kishën. Kur e kërkojmë Atë ashtu siç duhet, ne do ta gjejmë. Ai është xheloz, por Ai është plot dhembshuri; nëse largohet me zemërim, do të kthehet me mëshirë. Duke qenë begenisës dhe zemërbutë, Ai nuk lodhet me ne, por na e shfaq vazhdimisht hirin e Tij.
Mëkati zemrën time ka rrahur,E ka ngurtësuar, dashurinë ka zhveshur,Punoftë edhe hiri dhe rëntë nga lart Mbi zemrën time
Devocione “Mëngjes dhe mbrëmje” nga C. H. Spurgeon, rishikuar dhe përditësuar nga Alistair Begg.
Përktheu: Elton Tahirllari | Redaktoi: Rudina Boçe
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
© dritez.al 2023